Burgut qoyadan uchib tushib, changali bilan qo‘zichoqni ilib, osmonga ko‘tarildi. Buni ko‘rgan zag‘cha unga havas qildi:

— Men ham shunday qila olaman!

U bor kuchi bilan qanot qoqib, katta bir qo‘chqorning ustiga tushdi. Ammo uni ko‘tarishga kuchi yetmadi, ustiga-ustak, tirnoqlari qo‘chqorning qalin juniga ilinib qoldi. U qancha tipirchilamasin, qutula olmadi.

Cho‘pon yugurib kelib, zag‘chani ushlab oldi va qanotlarini qirqib, bolalariga o‘yinchoq qilib berdi.

— Bu qanaqa qush? — so‘rashdi bolalar.

— O‘zini burgut deb o‘ylagan zag‘cha, — javob berdi cho‘pon.

Hikmat: O‘zingni kuchingdan ortiq ko‘rsatishga urinish ko‘pincha kulgi va baloga olib keladi.