Ezop masallari

Kunlardan bir kun och qolgan tulki bir bog‘ga kirib qoldi. Qarasa, baland ishkomda pishib yetilgan, shirasi oqib turgan uzum boshlari osilib turibdi. Tulkining og‘zidan suv keldi.

U sakradi — yetmadi. Orqaga chekinib, yugurib kelib yana sakradi — yana yetmadi. Shu tariqa u uzoq urindi, oxiri holdan toyib, yerga cho‘zilib qoldi. Uzum esa avvalgidek tepada, yetib bo‘lmas joyda tebranib turardi.

Shunda tulki o‘rnidan turdi, dumini silkitib, burnini ko‘tardi va beparvo ohangda dedi:

— Hali xom ekan. Bunaqa nordon uzumni kim ham yerdi! Menga keragi yo‘q.

Va u uzumga qaramasdan, mag‘rur qadam tashlab bog‘dan chiqib ketdi.

Hikmat: Qo‘li yetmagan narsani yomonlab, o‘z ojizligini yashiradigan odamlar ko‘p.