«Karnatik»ning jo‘nashi ertangi kun ertalabga qoldirilgan bo‘lsa, Fileas Foggning o‘n olti soat vaqti bor edi. Bu vaqtni Audaning ishlarini hal qilishga sarflash mumkin edi.

Kemadan tushgach, janob Fogg yosh ayolni palanqinga o‘tqazib, «Klub» mehmonxonasiga olib bordi. Unga xona olib berdi va Paspartuga uning yonida qolishni buyurdi. O‘zi esa Audaning qarindoshi — boy savdogar Jijini qidirib ketdi.

Birjada uni hamma bilardi. Lekin Fogg u yerda bir xabar eshitdi: Jiji ikki yil oldin Gonkongdan ketgan edi. Katta boylik orttirib, Yevropaga — taxminlarga ko‘ra, Gollandiyaga ko‘chib ketgan ekan.

Fileas Fogg mehmonxonaga qaytib, Audaga bu xabarni aytdi. Auda bir zum indamay qoldi, keyin peshonasini qo‘li bilan silab, mayin ovozda so‘radi:

— Men nima qilishim kerak, janob Fogg?

— Juda oddiy, — javob berdi janob Fogg. — Yevropaga borasiz.

— Lekin sizga og‘irlik qilishni istamayman...

— Siz menga og‘irlik qilmaysiz va dasturimni hech qanday buzmaysiz. Paspartu!

— Labbay, janob? — Paspartu darhol paydo bo‘ldi.

— «Karnatik»ka boring va uchta kayutani band qiling.

Paspartu xursand bo‘lib yugurib chiqdi. Yosh xonim u bilan doim mehribon edi, va yigit unga juda bog‘lanib qolgan edi. U Auda ular bilan birga sayohat qilishda davom etishidan quvondi.

Pristanda u Fiksni ko‘rdi. Izquvar u yoqdan-bu yoqqa yurib, juda asabiy edi. Order hali kelmagan edi! Gonkong — Fiks uchun Foggni ingliz tuprog‘ida ushlashning oxirgi imkoniyati. Agar order ertaga ertalabgacha kelmasa, o‘g‘ri qo‘ldan ketadi.

— Xo‘sh, janob Fiks, — dedi Paspartu, — siz ham biz bilan Amerikagacha birga borishga qaror qildingizmi?

— Ha, — dedi Fiks tishlarini qisib.

— Bilardim! — qichqirdi Paspartu va qah-qah urib kuldi. — Bilardim, siz bizdan ajrala olmaysiz! Keling, siz uchun ham joy band qilamiz!

Ular kassaga kirib, to‘rtta kayuta olishdi. Kassir «Karnatik» ta’mirlash ishlari tugaganini, shuning uchun paroxod ertaga ertalab emas, bugun kechqurun soat sakkizda jo‘nashini aytdi.

— Juda soz! — dedi Paspartu. — Xo‘jayinim uchun bu yaxshi! Men hozir borib xabar beraman.

Fiks bu daqiqada bir qaror qabul qildi. U Paspartuga hamma narsani aytib berishga ahd qildi. Bu Foggni Gonkongda bir necha kun ushlab qolishning yagona yo‘li edi.

— Shoshmang, — dedi u. — Vaqtingiz bor. Keling, bir qadah ichamiz.

— Mayli, bir qadah ichamiz, — dedi Paspartu, va ular pristan yonidagi bir taverna eshigidan kirishdi.

Bu orada Fileas Fogg Auda bilan shahar do‘konlarini aylanib, yosh xonimga uzoq yo‘l uchun zarur bo‘lgan hamma narsani sotib olib berdi. Auda bu g‘amxo‘rlikdan xijolat bo‘lib, «Bu juda ko‘p», derdi. Fogg esa odatdagidek qisqa javob berardi: «Bu mening sayohat rejamga kiradi». Kechqurun ular mehmonxonaga qaytishdi. Fogg «Taymz» gazetasini o‘qishga o‘tirdi, Paspartu esa hamon qaytmagan edi. Xo‘jayin bunga ahamiyat bermadi: xizmatkor kayutalarni band qilgan va ertalab paroxodga yetib kelishini bilardi.